TV3 Tanzania - Game On

Ousmane Dembélé: Mwanzo wa Enzi Mpya

Kwa upande wa wanaume, shujaa wa Paris Saint-Germain na timu ya taifa ya Ufaransa, Ousmane Dembélé, ndiye aliyeibuka mshindi wa Ballon d’Or 2025. Hii ni mara yake ya kwanza kushinda tuzo hiyo kubwa, hatua inayomtambulisha rasmi kama mmoja wa wachezaji bora wa kizazi chake. Dembélé alipewa heshima hii baada ya kuiongoza PSG kutwaa taji la kwanza la Ligi ya Mabingwa ya Ulaya katika historia ya klabu hiyo, akicheza kwa kiwango cha juu na kuamua mechi muhimu.

Aitana Bonmatí: Malkia Asiyezuilika

Kwa upande wa wanawake, nyota wa Barcelona na Uhispania, Aitana Bonmatí, aliweka historia kwa kushinda Ballon d’Or ya wanawake kwa mara ya tatu mfululizo. Kwa mafanikio haya, Bonmatí amejiunga na safu ya magwiji kama Lionel Messi na Michel Platini, waliowahi kutwaa tuzo hiyo mara tatu mfululizo kwa upande wao. Uwepo wake uwanjani umeendelea kuifanya Barcelona na timu ya taifa ya Uhispania ziwe na ubora wa hali ya juu.

Vijana Wenye Ndoto Kubwa

Tuzo ya Kopa Trophy, inayotolewa kwa wachezaji bora wenye umri wa chini ya miaka 21, ilikwenda kwa Lamine Yamal wa Barcelona kwa upande wa wanaume, huku Vicky López, pia kutoka Barcelona, akitunukiwa tuzo hiyo kwa upande wa wanawake. Hii ilikuwa mara ya kwanza kwa upande wa wanawake kutolewa tuzo hiyo, jambo linalodhihirisha jinsi fursa kwa chipukizi wa kike zinavyozidi kuongezwa.

Mabeki wa Makipa

Kwa upande wa walinda mlango, Gianluigi Donnarumma wa PSG na Italia alitwaa Yashin Trophy kwa wanaume, akionyesha umahiri wake wa kuokoa michomo migumu. Kwa wanawake, Hannah Hampton wa Chelsea na Uingereza aliweka historia kama mshindi wa kwanza wa Yashin Trophy upande wa wanawake, akithibitisha hadhi yake kama mlinzi wa lango wa kuaminika zaidi.

Washambuliaji Hatari

Tuzo ya Gerd Müller Trophy, inayotolewa kwa wafungaji bora, ilimwendea Viktor Gyökeres, aliyeng’ara na Sporting CP kabla ya kujiunga na Arsenal. Kwa upande wa wanawake, Ewa Pajor wa Barcelona na Poland ndiye aliyeibuka mshindi kutokana na kasi na uthabiti wake katika kufumania nyavu.

Makocha Bora

Kwa mara nyingine, makocha waliobeba vikosi vyao mabegani walitambuliwa. Luis Enrique wa PSG alishinda tuzo ya Johan Cruyff Trophy kama kocha bora wa wanaume, kutokana na mafanikio yake ya kuibeba PSG kileleni Ulaya. Kwa upande wa wanawake, Sarina Wiegman, kocha wa timu ya taifa ya England, alithibitisha hadhi yake kama mmoja wa makocha bora zaidi duniani baada ya kuibuka na tuzo hiyo.

Vilabu na Tuzo za Kipekee

Kwa heshima za vilabu, Paris Saint-Germain ilitangazwa kama klabu bora ya mwaka kwa upande wa wanaume, huku Arsenal Women wakitwaa tuzo hiyo kwa upande wa wanawake. Aidha, Fundación Xana ya Uhispania ilipewa Sócrates Award, heshima inayotolewa kwa mashujaa wa kijamii na miradi ya kibinadamu inayogusa maisha ya watu nje ya uwanja.